[东方报]世冠盃：英超剋星愈戰愈強PSG衝4冠上盤好路[07-13]

杰尼杰尼

今晚世冠盃決賽上演歐洲冠軍級對決！歐協聯冠軍車路士，將會硬撼歐聯盟主巴黎聖日耳門（PSG）。兩大豪門陣容鼎盛，不過級數有明顯分野，PSG依家勇達巔峰，連皇馬都擋唔住，更何況係處於重建階段嘅「車仔」呢？加上PSG係「英超剋星」，誓要捧盃榮登4冠王，讓球盤PSG讓1球唔算多，不妨直取上盤。（周一凌晨3時開賽）

PSG喺安歷基調教下，今年表現大熟大勇，無論攻守都達到頂尖水平，過去3個月先後橫掃法甲、法足盃同歐聯冠軍，球員信心爆晒棚，為做「4冠王」今場贏波決心極大。PSG近10場比賽取得9勝，而且9場勝仗都至少贏對手2球，包括歐聯決賽5球痛宰意甲勁旅國際米蘭，以及喺世冠盃8強贏拜仁兩粒，分組賽對住馬德里體育會同4強鬥皇家馬德里，同樣豪派4蛋，簡直係遇神殺神。

睇番PSG今年歐聯登頂，一眾英超勁旅都向呢支法國班霸俯首稱臣，佢哋喺淘汰賽先後將利物浦、阿士東維拉及阿仙奴踢出局，聯賽階段亦曾以4比2大破曼城，可見PSG應付英超球隊特別有心得。事實上，PSG過去2次對車路士都順利贏波，今場絕對唔驚「藍戰士」。

車路士遇真正考驗
車路士喺今屆世冠盃表現尚算穩定，但佢哋晉級過程只曾對過1支歐聯球隊，未受過真正考驗，16強對賓菲加亦要鬥到加時先至攞到晉級席位，演出欠缺說服力，而且中場主將摩西斯卡些度上場足踝受傷，今場上陣成疑，勢必令「車仔」戰鬥力進一步打折扣。預計弗到爆嘅PSG隨時重演歐聯決賽大勝好戲，讓球盤PSG要讓1球都冇有怕，一於撐上盤。