[东方报]世冠盃：世冠盃8強開打 彭美拉斯無懼藍戰士[07-04]

下弦月夕颜

世冠盃8強大戰展開！巴甲勁旅彭美拉斯惡鬥英超豪門車路士。巴西球隊喺今屆世冠盃表現討好，球員狀態同適應力比歐洲球隊更勝一籌，彭美拉斯擁有今屆最堅固防線之一，有力抵禦「藍戰士」嘅進襲。車路士今場冇本錢讓波，寧捧讓球主勝（+1）。（周六早上9時開賽）

彭美拉斯踢法相當穩陣，葡萄牙籍領隊費拉拿作風保守，16強對保地花高一戰，就曾將防守表現不力嘅進攻核心艾斯迪華奧提早收起，最終90分鐘打和0比0下，喺加時小勝1比0晉級。彭美拉斯今屆4場賽事1勝3和未逢敗仗，而且有3場保持不失，防守力非常堅挺。

利安戴納尼干古冇料到
車路士喺16強要踢到加時，先至喺人多打人少情況下淘汰賓菲加，今屆4場賽事只有2場喺法定時間內贏波，而且對手係FC洛杉磯同艾斯柏蘭斯兩支弱旅，面對實力較強球隊就踢得相當吃力，利安戴納、尼干古等前鋒未見威力，新加盟嘅祖奧柏度只係練咗兩課，唔可以抱太大期望。

巴甲球季正值季中，彭美拉斯依家狀態十足，反而車路士經歷漫長球季後，身、心狀態都打折扣，佢哋今屆分組賽就曾經1比3輸畀另一巴甲球隊法林明高，今場面對硬淨嘅彭美拉斯，要喺法定時間贏波難度唔細，讓波更加冇本事，讓球主勝（+1）值得支持。