[东方报]世冠盃：國米冇厘神氣捱細界[06-30]

中国灬橘子哥

另一場世冠盃16強，意甲「藍黑兵團」國際米蘭迎戰富明尼斯。國米由新帥捷禾接手執教下「冇厘神氣」，今屆3場世冠盃都踢得相當辛苦，加上中場大腦查漢奴古養傷，削弱組織攻勢能力，不宜高估。巴甲球隊富明尼斯踢法保守，近5場賽事有4次總入球開2球或以下，寧願揀中位數2.5球嘅入球細。（周二凌晨3時開賽）

國米經過歐聯決賽慘吞5蛋嘅打擊，以及主帥施蒙尼恩沙基離隊，球隊正處於重建之中，新帥捷禾接手後有意推倒重來，今屆世冠盃頻頻試用年輕球員，包括前鋒艾斯普薛圖兄弟、中場阿沙拿尼、新兵路爾斯軒歷基斯都獲得機會，明顯為下季做準備，難免影響整體發揮。國米首場僅僅打和墨西哥球隊蒙特雷1比1，其後幾經艱苦反勝日職球隊浦和紅鑽，上場分組煞科戰對河床，都要等到對手有球員被逐，先至入波打開紀錄，反映攻力有待改善，今場想攻入富明尼斯大門，並唔容易。

富明尼斯踢開穩陣波
富明尼斯喺今屆賽事大踢穩陣波，3場分組賽有2場悶和對手0比0，全靠擊敗南韓球隊蔚山HD，先至獲得16強席位。呢支巴西代表論實力唔及國米，預料會繼續採取穩守突擊戰術。防線上有經驗豐富嘅前車路士中堅堤亞高施華鎮守，尚算可靠。加上淘汰賽一戰定生死，兩邊都唔敢太過冒進，以免先失守陷入劣勢，出現拉鋸局面居多，入波唔慌多。