[东方报]熱身賽：昔鋼門重返奧脫福 迪基亞倒戈好細界[08-09]

极地冰雕

英超開鑼前，曼聯最後1場熱身賽，主場迎戰意甲球隊費倫天拿，焦點必定係昔日紅魔鬼鋼門迪基亞首次回歸奧脫福球場倒戈，當然要做齣好戲，力保大門不失。至於曼聯考慮到首場英超就要硬撼阿仙奴，預料會留力避免出現傷兵，寧願博3.5球嘅入球細。（Now 640周六晚7時45分直播）

迪基亞2年前不獲曼聯續約，黯然結束12年紅魔鬼生涯，呢位34歲西班牙門將寶刀未老，即使曾「失業」1年，但上年夏天加盟費倫天拿，繼續有高水平發揮。費倫天拿上場熱身賽對另一支英超球隊諾定咸森林，迪基亞成功「零封」對手打和0比0，今次返到自己最熟悉嘅奧脫福球場，加上佢仍非常受曼聯球迷歡迎，反而佔有地利、人和，有利佢表現。此外，曼聯會方將於開波前向迪基亞頒發獎座，表揚佢過往貢獻，注定成為今場主角。

紅魔開咧在即必「錫身」
至於曼聯今夏積極增兵，備戰工作出色，踢熱身賽交足功課，近3場取得2勝1和，今仗贏面的確比較高。不過，距離英超開鑼只有1星期，實在冇必要浪費太多力量踢熱身賽，尤其是第1場聯賽立即鬥阿仙奴，球員需要養精蓄銳，預料曼聯今仗踢完上半場，應會立即收起主力休息，削弱攻入費倫天拿大門機會，加上「紫百合」仲未撻着，近4場熱身賽總入球全開3球或以下，估計今仗入波只會一球起、兩球止。