[东方报]德甲：揭幕戰搶頭威！拜仁劈錫大陣仗[08-22]

袁宇宏

德甲開鑼，衞冕拜仁慕尼黑首輪主場迎戰RB萊比錫。拜仁上季重奪德甲冠軍，今季繼續強化陣容，重金簽入路易斯迪亞斯，仲喺德超盃有「士哥」，證明冇入錯貨，今場肯定繼續數胡；RB萊比錫雖有主力射手離隊，但佢哋踢法冇變，上場德盃照開大比數，加上兩隊碰頭經常開入球騷，3.5球入球大值得支持。（Now 639周六凌晨2時30分直播）

拜仁今夏世冠盃8強不敵巴黎聖日耳門，休息唔夠1個月就復操，安排3場熱身賽，先後對里昂、熱刺同草蜢，取得全勝，其中對熱刺大勝4比0，上周再以2比1擊敗史特加捧走德超盃，射手哈利卡尼同路易斯迪亞斯都有進帳，球隊上下已準備好迎接新球季，聯賽首輪主場出擊，當然希望頭威頭勢，不但要贏，仲要爭取入多幾球。

萊比錫入得又失得
至於RB萊比錫，雖然佢哋臨開季有主力射手班捷文施斯高轉投曼聯，但並冇影響球隊部署。睇番球隊今夏熱身賽成績，幾乎場場大比數，最勁嗰場大炒圖盧茲7比0，上仗德盃亦以4比2大勝辛特侯遜，可見球隊入得又失得，總入球開「6球」同「7+」都係家常便飯；再睇雙方近年碰頭數據，近5次聯賽交手4次開4球或以上，今次喺聯賽揭幕戰相遇，肯定會盡情入球娛賓，3.5球入球大不容錯過。