[东方报]歐冠：阿仙奴弗爆反轉畢爾包[09-16]

澤君

周三凌晨歐聯頭場，有畢爾包主場迎戰阿仙奴。畢爾包上季喺歐霸盃異軍突起殺入4強，最終不敵曼聯止步，兩回合總比數慘敗1比7，今仗迎戰實力更強嘅阿仙奴，機會難免睇淡；阿仙奴上季闖歐聯4強，踢歐洲賽穩定性極高，今場捧客勝係信心之選。（Now 643周三凌晨零時45分直播）

陣容殘缺難擋兵工廠
「兵工廠」英超開季4戰3勝，上場大勝諾定咸森林3比0，表現極爽，佢哋上季歐聯聯賽階段8戰6勝直入16強，最終打入4強，證明球隊擁有喺歐聯爭取佳績嘅能力。今季阿仙奴進一步擴軍，實力更上層樓，今場即使作客亦有把握能夠全取3分，留意到阿仙奴近3次歐聯作客西甲球隊全勝，今場唔會驚畢爾包。

另邊廂，畢爾包喺西甲開季獲得3連勝後，上場聯賽0比1輸畀艾拉維斯，最慘係佢哋目前嘅兵源，唔足以兼顧西甲同歐聯兩大戰線，唔單只進攻核心尼高拉斯威廉斯因傷缺陣，後防主力耶雷艾華利斯亦因為禁藥問題被罰停賽，新加盟嘅中堅拿樸迪又未喺歐聯名單當中，陣容殘缺情況下，難阻阿仙奴全取3分。