[东方报]歐超盃：爭冠求穩打穩紮 PSG撼熱刺蓄細待發[08-13]

加菲史蒂芬

年度盛事歐洲超級盃今晚喺意大利爆發，上屆歐聯盟主法甲豪門巴黎聖日耳門（PSG），火併歐霸盃冠軍熱刺。論實力PSG明顯優勝，不過佢哋復操冇耐，狀態及唔得上踢咗幾場熱身賽嘅熱刺。PSG向來靠穩健防守爭勝，今場會穩中求勝，3.5球入球細機會高唱入雲。（Now 643周四凌晨3時直播）

PSG贏咗歐聯冠軍後，喺緊接嘅世冠盃同樣打入決賽，可惜不敵車路士屈居亞軍。由於佢哋要踢世冠盃，導致未有時間進行任何季前熱身，一班球星上周三先放完假歸隊，練咗一個星期左右就要踢今晚歐超盃，狀態唔慌好。反觀熱刺季前備戰積極，四出「搵銀」之餘順便催谷狀態，已經踢咗6場熱身賽，論球員狀態比PSG更佳。

聖日耳門靠防守制敵
聖日耳門今夏未有大動作收購，幾乎以原班陣容出擊，佢哋攻擊陣容強大，但更重要係一條鋼鐵防線，近9場賽事就有7場保持不失，特別係祖奧尼維斯同域天拿領導嘅中場線每每主導戰局，就算前線狀態未足入唔到波，亦唔會畀到對手有太多埋門機會。

熱刺今季有得踢歐聯，球隊由上至下變化極大，搵嚟法蘭克取代普斯迪高路執教，踢法上唔會好似近兩季咁過分沉迷超高位逼搶，加上有隊長孫興民離隊，進攻中場占士麥迪臣早前不幸喺熱身賽重傷長抖，令進攻火力大打折扣，今場面對歐洲王者PSG，多數守住先務求不失，預測入球唔會太多。睇番近6屆歐超盃法定時間全開3球或以下，雙方求穩之下，3.5球入球細相當穩陣。