[东方报]熱身賽：最後一舞 孫仔告別熱刺尋找新挑戰[08-03]

小鱼爱喝可乐

熱刺周日晚「亞洲之旅」南韓站，同紐卡素踢熱身賽，隊長孫興民出席賽前記者會時宣布，將於今夏離開呢支效力咗10年嘅英超勁旅，今場好大機會成為佢嘅告別戰，全隊上下肯定出力希望贏波，為佢帶嚟美好回憶。不過「喜鵲」爛船都有三斤釘，反擊能力仍然強勁，今場有望演入球騷，博3.5球入球大。（HOY TV 76台周日晚7時直播）

有關孫興民準備離隊消息已經傳咗一段時間，呢位射手親自證實：「我想同大家講，我已決定今夏離隊，球會亦好尊重我嘅決定，並且正在協助我處理轉會事務。今次係我職業生涯最艱難決定，效力熱刺日子，已經取得我最重要嘅成就，需要新環境迎接新挑戰，年輕時候嚟到北倫敦，當時仲係一位唔識英語嘅男孩，離開時已經成為一位男人，感謝一直支持我嘅熱刺球迷。」

孫興民2015年由利華古遜加盟熱刺以來，為球隊上陣454場入173球及101次助攻，其中2021/22年球季以23個入波，與穆罕默德沙拿平分英超神射手獎，上季更協助熱刺捧歐霸盃冠軍。日前熱刺訪港同阿仙奴踢熱身賽，「孫仔」亦以隊長身份帶領球隊捧走贏波獎盃。

「主場」同紐卡素大鬥法
熱刺同紐卡素交手後，將飛回歐洲，今場喺首爾世界盃球場舉行嘅熱身賽，隨時成為孫興民告別戰，佢喺祖國完成熱刺生涯最後一戰，別具意義，熱刺必定獲主場球迷鼎力支持，形同擁有「半個主場」，球隊多數會主動搶攻。香港球迷亦可能會係最後一次，喺電視直播中睇到「孫仔」披上熱刺球衣，大家真係不容錯過。據悉孫興民將轉投美職球隊FC洛杉磯，屆時可以同美斯等球星交鋒。

紐卡素王牌前鋒阿歷山大伊沙克因扭計轉會並冇隨隊，但「喜鵲」仲有安東尼哥頓同新兵安東尼艾蘭加等掛帥，踢反擊戰威力猶在，早前喺新加坡同阿仙奴激戰下2比3落敗，證明入波能力一樣掂。紐卡素同熱刺近年交鋒，都係大踢進攻足球，今場有望再開入球騷，3.5球入球大抵玩。